Kusilluyuq sipas - VII

“Pim kanki? Imatam kay ñawpa wakamuchanawasipi maskachkanki?”
“Qillqaykamayuqmi kani. Rikchaq llimpita maskakuni iglesiapi imagenniykunata tullpuypaq. Qamri pim kanki? Imamantam kay ayachuranawasipi pakasqa tiyanki?”
Machuqa asirirqan.
“Teófilo Kusiñawpam kani. Padre Visitadormi llaqtaymanta qarquyta munawarqan. Limaqpi Santa Cruz ñisqa wataywasipim churayta munawarqanku. Sapay Diosman iñiq runamasiymi qispichiwarqan. Kayman ayqimurqani. Huk huk llaqtakunamantari machukuna mikunata ñuqapaq apamunku. Wakin runakunaqa manam kayman hamunchu ayakunata manchaspa.”
Ñataq asirirqan.
“Imaraykutaq tukuy chaytaqa willawanki? Ichapas ñuqach qawmiwa kayman.”
“Ñuqa yachani, apuskikunap samaykusqan kasqaykita. Yanarunakitimanta apuskiykip samaykusqan kasqaykita, kay ñuqaykup llaqtaymanta apuskiykup samaykusqan kasqaykitapas yachani. Ñuqaqa machum kani, ichaqa kallpayuqmi. Chay huiracocha ñisqa awqayku kay kitiykuman hamuspa chakraykuta qullqiykuta ima haykaykuta qichuwarqanku mana imatapas saqiriwaspa. Pim chayta kamachirqan. Manataq sapay Dioschu karqan. Ñuqam sapay Diospa yanan kani. Espíritu Santomanta kallpayta chaskini, ñawpa wakakunamantapas kallpayta chaskini. Chaqay visitadorkuna –Sapay Diospa yanan ñisqakuna– muchuchiwarqan iskaypachak kuti qara waskawan waqtachiwaspa. Kaypim ñawpa wakaykumanta apuskiykumanta yanapayninta mañakuni chaqay saqra Diospa awqanta llaqtaymanta qarqunaykupaq.”
“Manachu Diosqa wakakunap awqan?”
“Manam. Dioshina wakin wakakunapas ñinku: ‘Suwakuyqa manam allinchu, mana huchayuq runakunata muchuchiyqa manam allinchu, hukpa warminwan puñuyqa manam allinchu. Tukuyninkum ‘runakuna qasi qasilla waki kawsachun!’ ñispa kamachinku. Tukuy chay huchuylla sichpa kaq llaqtakunamanta machukuna payakuna hamunku Diospaq wakakunapaqpas aswata mikunatapas apamuspa. Kaypim takiyku, tusuyku. Atipayniykup punchawninmi qayllaykamuchkan. Inkanchikri mana wañusqa kaspa San Lorenzo wawqinwan huk pachamanta kutimunqa. Kutimuptin kay millay pachaqa puchukanqa. Ñataq kusikusun. Qamri kaypi paryallimpita llaqsallimpita maskaspa yachaytaq: chay rikchaqwan pintaspa wakakunap samaykusqan kanki. Imagenniykita qillqaspa rurasqaykita manam riqsinkichu. Wakakunap qillqan kanqa! Huk mita llaqtamanta qarquytukuptiyki tarinakusun.”