Padrep watiqaynin - III

Qayantinmi Teófilo miski yurayuq timpusqa yakuta aslla kamchatawan apamuspa hamurqan. Padreqa utqalla kamarikurqan. Chaysawam pampaman lluqsimuspa chunka, ichapas chunka iskayniyuq runallata iglesiap punkunpi suyachkaqta rikurqan.
“Maypitaq wakin runakuna kanku?”
“Padre, kay llaqtapi kay aslla runakunalla qipariyku. Pachap kuyusqanmantari huiracochakunap apamusqan hatun unquymi achka runata wañuchirqan. Wakin runakunaqa yunkañiqman chiqachakuptin mana ñispa huk huk llaqtakunaman huiracochakunapaq llamkapakuq riptinku machukunalla payakunalla kaypi qipariyku.”
“Imaraykutaq wamraykikuna

? Manam huktapas rikunichu.”
“Wamraykuna sallqapi llamaykunata michinku.”
“Manam allinchu kay! Tukuy wamrakuna doctrinaman hamuchunku apunchik Jesucristop kamachisqa siminta yachakunanpaq, chaytam tukuyniykichik yachankichik.”
“Arí, padre.”
“Kunanqa iglesiata musuqmanta pirqanaykichikmi ichuta maskaspa musuq qatata ruranaykipaq. Kay llaqtapiqa kan? ?”
“Manam, padre.”
“Imahinataq kikiykip wasiykitapas allichakunkichik?”
“Padre, ñam tukuy wasiykuna raqay tukusqata rikurqanki, wayna churiykunari tukuynintin kaymanta karunchaptinku mana ñam llaqtaykupi sinchi runakuna kanku sasa llamkayta rurananpaq.”
Padreqa upallarqan. “Chaqay machukunaqa ñukñawachkan” ñispam musyakurqan. “Kikiymi risaq wakin runakunata maskaq.”
“Sapa runa papata chuqlluta aychata mita mitanpi apamuchun ama ñuqa padreyki yarqaymanta wañunaypaq.”
Runakunaqa as piñakuqhina ripurqanku. Wakinnin iskuta maskarqanku allpamanta surquspa kusanankupaq, wakinninpas sachata kuchurqanku kulluta llaqllananpaq ichutapas aparqanku qatata allichananpaq. Paykuna hawasiminta rimaptinkum padreqa rimasqanta mana unancharqanchu.
“Tukuyniykichik bautizasqachu kankichik?”
“Arí, padre.”
“Hinaspam kaytapas yachankichik: ñawpa wakakunap rantin ima imankunata waqaychaptiykichikqa hatun hucham kanman.”
“Manam, padre, manam kaypiqa idolatrachu kayku. Tukuyniyku bautizasqa kayku. Padre kaptinqa domingopi misaman riyku. Mana padre kaptinqa wasiykupi rezayku.”
“Manachu kaypi huk wakamuchaq kanman? Isabel Chawpitiklla, manachu wakamuchaq kanki? Manachu wasiykipipas ñawpa waka Qullqiruntup rantin rumita waqaychanki?”
“Llulla simim kayqa, padre. Pitaq chayta willasurqanki? Kaypim achka mana allin runakuna qasimanta wakin allin cristianokunata chatanku. Wiñaylla llaqtamanta illaptiyku . Mana ima rurananpaqpas kaptinmi tukuy punchaw chayhina llullata rimanku. Siminkuta manam iñiypaqchu.”

Chisiyaptin padreqa mikusqanmanta rezachkarqan. “Yaya Dios, imahinam kay millay millay llaqtamanta qispikuspa huk aswan allin ima haykayuq doctrinata chaskiyman?”
Qunqayllamanta runa punkuta takaqta uyarirqan.
Ña pacha tutayaptin hawapi yanayaptinpas padreqa mancharispa “pim kanki?” ñispam tapurqan.
“Ñuqam, padre, Isabel Chawpitiklla kani. Padre, mana allin mikunallata mikuspam , chayraykum kay wira wallpata apamuni. Padre, pich kaypi chiqanpi awqayki kaqta manaraq riqsinkichu. Chay Teófilo Kusiñawpa allin runa tukuq, pay kikinmi idólatra. Kikinpa wakanpa unanchan iglesiapi churasqan kaptin ‘wakamuchaqmi’ ñispa tumpawarqanku. Llulla suwa pay, padre, amataq llulla siminta iñiychu.”
Piñakurispam padreqa “wallpanta mana chaskisaqchu” ñispa sunqunpi ñirqan. Chaysawam yuyarqan “chiqanpi yarqaymanta wañuchkani” ñispa. “Qayam chay chaykunata taripasaq” ñispam yuyarqan.
Wallpata kimsa runtutawan chaskispa Isabelta ripuchirqan.
“Manam chayhina rantiwanqachu” ñispam Teofilota maskaq rirqan wallpata runtutapas yanuchinanpaq.